Pito ka mga Local Government Units (LGU) sa probinsya sang Negros Occidental ang apektado matapos ang lapnagon nga pagbaha sang Sabado Enero 31.
Sa interview sang Bombo Radyo kay Irene Bel Plotena, head sang Negros Occidental Provincial Disaster Risk Reduction and Management Office (PDDRMO), ang mga apektado nga mga banwa kag ciudad amo ang Sagay City, Calatrava, Toboso, EB Magalona, Cadiz City, Talisay City kag Escalante City.
Suno diri, nagdangat sa 2,409 ka pamilya ukon 8,927 ka indibidwal ang apektado sang pagbaha.
Suno diri, nakapauli na ang pila ka mga evacuees kahapon sa ila tagsa ka panimalay.
Sa karun, may ara nalang sang 582 ka pamilya ukon 2,603 ka indibidwal nga nagapabilin sa evacuation area, nga kalabanan totally damaged ang mga balay.
Mensahe ni Plotena sa pumuluyo ilabi na sa mga yara sa low-lying areas nga magapabilin nga alerto kag gilayon nga magsunod sa abiso sang DRRMO.
Dugang pa sini, ginarekomendar nga magpreparar sang “emergency go bag” nga may unod nga mga basic nga kinahanglanon kaangay sang pagkaon, tubig, bayo, radyo kag first aid kit.
Ini bangud ginalauman sa masunod nga semana ang pag-ulan nga mahimo makatuga sa liwat sang pagbaha.
