Masobra P600,000 nga balor sang illegal nga druga ang nakompiskar sang City Drug Enforcement Unit sang Bacolod City Police Office sa buybust operation nga ginpatigayon sa Purok Progreso, Brgy. Taculing, ciudad sang Bacolod kaina pasado alas 3:00 sang aga.
Sa impormasyon nga nakuha sang Bombo Radyo, ginkilala ang suspetsado kay Reynaldo Villaistin, 38 anyos, single kag ginakabig nga high value individual.
Nakuha sa iya paghinakop ang isa sa gamay nga transparent plastic sachet sang suspected shabu, anum ka small heat sealed transparent plastic sachet sang suspected shabu, 11 ka big heat sealed transparent plastic sachet sang suspected shabu kag isa ka unit sang cellphone.
Ang nakompiskar nga illegal nga druga ang ginabanta nagabug-at 55 gramos kag nagabalor P605,000.
Suno sa mga otoridad, isa ka semana nila nga ginmonitor si Villaistin kag wala na ini nagbato sa ila gindakop kaina.
Nahibaluan nga nakaagi na ini priso bangud sa kaangay nga kaso.
Sa karun, yara ang suspetsado sa kustodiya sang Bacolod Police Station 6 kag natalana nga pasakaan sang kaso.
