Masobra 6,000 ka job vacancies ang at stake sa Kalayaan Job Fair nga patigayunon sang Department of Labor and Employment sa Independence Day sa Hunyo 12.
Suno kay DOLE Negros Occidental head Mary Agnes Capigon, ang Kalayaan Job Fair ang patigayunon sa Domingo sa event area sang SM City Bacolod.
Suno kay Capigon, may yara employment facilitation para sa job fair kaangay sang skills training kag entrepreneurial seminar nga sponsored sang Department of Trade and Industry.
Alas-6:30 sang aga, may yara sang caravan nagikan sa Bacolod City Government Center padulong sa SM City.
Ini ang pagasundan sang Thanksgiving Mass alas-9:00 sang aga, opening program kag simultaneous na sa job fair kag trainings.
May yara man sang igabutang nga help desk ang DOLE.
Sa karon, masobra 50 ka employers nga may vacancies local kag overseas ang sigurado nga makigbahin sa Domingo kun sa diin masobra 6,000 ang job vacancies.
Halin sang nagsugod ang COVID pandemic, ini ang labing una nga kahigayunan nga may yara naman sang face-to-face job fair.
Sa karon, may yara na sang 1,800 ka online registrants kag ginalauman man ang mga walk-in applicants.
Nagpanugyan naman si Capigon sa magakadto sa job fair nga indi gid pagkalipatan ang employment documents antes magsabak sa interview.
