Masobra sa 7,000 ka mga local job kag 1,000 ka mga overseas job ang bakante nga pwede ma-applyan sang job seekers sa job fair nga patigayunon sang Department of Labor and Employment (DOLE) – Negros Occidental.
Sa interview sang Bombo Radyo kay Carnela Abellar, DOLE Negros Occidental Head, sa pinakauna nga kahigayunan, ang DOLE magapatigayon sang job fair sa kabug-usan nga Pilipinas sa Mayo 1 kadungan sang Labor Day.
Diri sa ciudad sang Bacolod, ang job fair ang patigayunon sa SM mall, alas- 9:00 sang aga tubtob alas- 5:00 sang hapon.
Suno kay Abellar, lima ka overseas agencies kag 62 ka mga local agencies ang naka-register na sa DOLE para sa job fair.
Sa local job sa probinsya sang Negros Occidental may yara sang 7,985 ka job vacancies samtang sa overseas naman may yara sang 1,785 ka job vacancies.
Nagpanugyan naman ini nga mas maayo nga nakasulod na sa pre-registration online agud nga mas madasig ang pagsulod sa job fair bangod ini ang may lain nga linya kumpara sa walk-ins kag dugang pa sini nga magdala sang TOR, resume kag Certificate of Employment kun may job experience na, samtang may nahamtang man nga help desk para sa mga ahensya kaangay sang Social Security System (SSS), Bureau of Internal Revenue (BIR), PhilHealth, PAG-IBIG, Philippine Statistics Authority (PSA), kag Technical Education and Skills Development Authority (TESDA) kun sa diin iban diri ang magabaton man sang luyag nga mag-apply sa ila.
Ginpatpat naman ni Abellar ang pila ka mga agencies nga yara didto, kaangay na lamang sang Philippine Army nga may 400 job vacancies kag assistant continuing care sa Canada nga nagapangita sang 200 workers kag costumer service representatives nga may masobra sa 5,000 ka job vacancies.
Samtang, yara man didto ang KADIWA ng Pangulo fair, kun sa diin mahimo nga makabakal sang local products sa manubo nga presyo.
