Nakapauli na kahapon sa Jolo, Sulu ang kabug-usan nga 73 ka mga Badjao nga nagaliho-liho sa dalanon sang syudad sang Bacolod.
Sa interview sang Bombo Radyo kay Bacolod City Department of Social Services and Development head Pacita Tero, kapin duha ka bulan nga ginsapupo sang syudad sang Bacolod ang mga Badjao.
Aminado si Tero nga nabudlayan sila nga mag-engganyo sang mga Badjao bangud nahadlok sila nga basi patyon sila apang gintinguhaan sang DSSD nga maengganyo kag madala sila sa Youth Home sa Abada Escay Relocation Site sa syudad sang Bacolod.
Madugay man ang nangin koordinasyon sa syudad sang syudad kag Office of the Civil Defense-Western Visayas kag Department of the Interior and Local Government agud makapauli ang mga ini bangud sa istrikto nga mga border control bangud sa pamahog sang Covid-19 kag nadelay pa ini dugang bangud sa pagpabomba nga nagluntad sa Jolo, Sulu sang damlag lang.
Apang kahapon, hilway nga nga nadala sang personnel sang DSSD kag Bacolod City Police Office sa Dumaguete City sa first leg sang ila journey papauli.
Ginpasalamatan ni Mayor Evelio “Bing” Leonardia si Governor Roel Degamo sang Negros Oriental sa pag-aprubar nga makaagi ang mga Badjaos sa territorial jurisdiction sa Negros Oriental direkta sa pier sang Dumaguete City kahapon.
Halin sa Dumaguete, ang mga Badjao ang magabyahe padulong sa Zamboaga City paagi sa sea travel.
Pag-abot sang mga ini ang OCD sang Bangsamoro Autonomous Region for Muslim Mindanao (BARMM) ang magabaton sa ila agud masiguro nga hilway ang pagbiyahe padulong sa Jolo.
Ang nakapauli nga mga Badjao ang miyembro sang 33 ka mga pamilya santo sa pagbanta sang DSSD sadtong Agosto, suno man sa instruction sang alkalde.
Matapos nga magliho-liho sa dalanon sang syudad, ang mga Badjao ang temporaryo nga nagpuyo sa Bacolod Youth Home sa Barangay Vista Alegre kag ginhatagan man sila sang City government sang pagkaon kag iban pa basic necessities.
Para sa ila pagbiyahe, ginhatagan man sila sang pagkaon, cash allowances para ila gastuhon, nagrenta sang bus agud madala ang mga Badjao sa Dumaguete City, nagbayad sa pamasahe sa barko tubtob sa Zamboanga City gamit ang program funds sang DSWD nga ginpaagi sa DSSD.
Ginpahayag man ni Tero nga nagpasugot ang mga Badjao nga makapauli matapos nga sila ang maathagan sang risgo samtang sila ang yara sa dalanun sang Bacolod sa tunga sang COVID-19 outbreak.
