Ginkompirmar sang pinuno sang Department of Social Welfare and Development Region 6 nga 71.43% na ukon 95 sa 133 ka mga local government units ang nahatagan na sang Social Amelioration Program Cash Grant.
Sa interview sang Bombo Radyo kay Ma. Evelyn Macapobre, ginpahayag sini nga 99.07 percent na ang nahatagan sa E.B Magalona kun 9,079 ka mga beneficiaries.
98.81 percent naman ukon 2912 ka mga benepesyaryo ang nahatagan sa banwa sang Candoni.
Sa Don Salvador Benedicto, suno kay Macapobre,96.18 percent ukon 2,744 na ang nahatagan sang cash grant.
22,840 naman ang kabug-usan nga mga food packs nga napanghatag sa bilog nga Western Visayas.
2,200 diri ang ginhatag sa Aklan; 3,244 sa Antique; 4,800 sa Capiz; 1544 sa Guimaras; 7,319 sa Iloilo; kag 3,277 sa Negros Occidental.
Nagpasalig man ini nga sa madali nga panahon, makompleto na ang paghatagay sang SAP Cash Grant.
