Kabug-usan nga 725 ka mga specimens ang nakolekta sang ciudad sang Talisay kadungan sa ginpatigayon nga mass testing kahapon.
Sa interview sang Bombo Radyo Bacolod kay Dr. Joy Guanzon, pinuno sang Talisay City Health Office, ginpahayag sini nga kapin 900 ang nakapa-pre enlist sa ila tatlo ka adlaw antes ang ginpatigayon nga mass testing apang may yara sang wala nakakadto sa apat ka mga testing areas.
Nahibaluan nga ang mga mass testing ang ginpatigayon sa Dos Hermanas Covered Court, Talisay Public Plaza, Zone 10 Covered Court kag Zone 3 Covered Court.
Suno kay Guanzon, nagpatigayon na sila nga daan sang pre-enlisting agud maobrahan na sang case investigation form kag ginpasa sa provincial government para sa encoding agud mahapos na lang ang reporting nga himuon.
Dugang pa sini nga ila ginhatagan prayoridad nga itest amo ang mga naka-closed contact sa mga COVID patients, symptomatics ukon may yara sang ginabatyag nga sintomas sang coronavirus kag mga frontliners.
Gin-athag naman sini nga isa lang ka adlaw ang mass testing sa Talisay kag wala na subong nga adlaw.
Nagpangabay naman si Guanzon sa mga Talisaynon nga magsunod gid sa basic health protocol bangud sa nagasaka nga kaso sang local transmission sang balatian.
Samtang, sa ciudad sang Silay, kabug-usan nga 315 ka mga specimens ang ila nakolekta kahapon.
