Kapin P8.2 million nga balor sang illegal nga druga ang insunog sang Philippine Drug Enforcement Agency Region 6 kahapon sa Gegato-Abecia Funeral Homes and Crematory Inc., Coastal Road, Jaro, Iloilo City.
Sa interview sang Bombo Radyo kay Ma. Graziela Tanaleon, public information officer sang PDEA 6, ginpahayag sini nga ginpaidalum sa thermal decomposition ang kabug-usan nga 1,142.9946 grams sang methamphetamine ukon shabu nga nagabalor P7,772,363.28; 3,741.2947 grams sang marijuana nga may balor P448,955.36; 1.0100 grams sang ephedrine nga may balor P353.50 kag duha ka tabletas sang diazepam nga nagabalor P32.00.
Suno kay Tanaleon, ang mga ginpangsunog amu ang mga illegal nga druga nga narecover sa mga anti-drug operations kag ginpangturn-over sang iban nga mga law enforcement agencies santo sa mando sang korte nga idispose.
Suno diri, nangin witness sa aktibidad ang mga key officials sang PDEA, mga representative nagikan sa Philippine National Police (PNP) kag iban pa nga mga law enforcement agencies; Department of Justice (DOJ); non-government organizations (NGOs) kag mga media partners.
Ang direktiba nga sunugon ang mga illegal nga druga ang yara sa idalum sang Section 21(4) sang Republic Act 9165 ukon Comprehensive Dangerous Drugs Act of 2002 nga nagarequire sa mga trial courts nga magpatigayon sang ocular inspection sa mga illegal nga druga kag paraphernalia sa sulod sang 72 ka oras matapos ang filing sang impormasyon sang criminal.
Suno sa PIO, ang thermal decomposition ukon thermolysis ang method sang pagdecompose ukon pagbreak down sang chemicals paagi sa kainiton.
Sa 1,000 degrees centigrade, lunsay nadecompose ang tanan nga druga.
Nagpasalig man ini nga ang PDEA ang magapadayon sa pagfacilitate kag pagsunod sang mga direktiba nagikan sa national government.
Nagalaom man ini nga mangin COVID free kag drug free ang rehiyon kag pungsod.
