Masobra 800 ka police personnel ang natalana nga ideploy agud magbantay sang seguridad sa Panaad sa Negros Festival 2025.
Sa interview sang Bombo Radyo Bacolod kay Negros Occidental Police Provincial Office Spokespeson Police Captain Judesses Catalogo, ang send-off ceremony sang mga personnel ang ginpatigayon alas-2:00 sini nga hapon sa Panaad Park and Stadium, nga gintambungan man nanday Negros Occidental Governor Eugenio Jose “Bong” Lacson kag Bacolod City Mayor Alfredo “Albee” Benitez.
Ginpresentar diri ang mga resources kag deployment sang mga personnel.
Masobra 800 ang personnel nga ideploy para sa security kalakip na ang 150 personnel nga augmentation gikan sa Bacolod City Police Office.
Magluwas sa mga ini may 200 man ka Emergency Personnel Response Team gikan sa nagkalainlain nga mga Local Government Units.
Magasebe naman nga site task group commander si NOCPPO Director Police Col. Rainerio de Chavez.
Sa pihak sini, ginpanugyan ni Catalogo nga bisitahan ang facebook page sang Negros Occidental PNP bangod diri nakapost ang mga advisories kasubong man ang road closures kag rerouting sa kada adlaw nga event.
Ang opening sang Panaad sa Negros Festival 2025 ang patigayunon sa Lunes alas-4:00 sang hapon sa Panaad Park and Stadium.
