Kabug-usan nga 91 ka mga locally stranded individuals (LSIs) kun sa diin tatlo diri ang mga kabataan, nagikan sa nagkalain-lain nga banwa kag ciudad sa probinsya sang Negros Occidental, nga nastranded sa Tabuelan Port sa Cebu ang nakapauli na kag yara sa Cadiz healing center sa karon.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, ginpahayag sini nga antes paman ang pagrepatriate sa mga LSIs, personal nga nakasugilanon sila ni Tabuelan Mayor Rex Gerona agud maareglo ang pagpauli sang mga Negrense.
Santo sa kasugtanan, indi pwede nga mabyahe sang tingob papauli ang mga LSI bangod indi ini makaigo sa Cadiz Healing Center.
Sa tion naman nga mabuhinan na ang load sang pasilidad, masunod naman nga iga-schedule nga makapauli ang nabilin nga LSI sa Tabuelan, Cebu.
Nagapasalamat man si Lacson kay Gerona sa pag-akomodar kag pagtatap sa mga Negrosanon didto.
Suno sa gobernador, malapit isa ka bulan man nga ginapakaon sang alkalde ang mga stranded LSIs sa amo nga banwa
Samtang, ginsuspinder sang national inter-agency task force against COVID-19 ang repatriation sang mga locally stranded individuals (LSIs) kag returning overseas Filipinos (ROFs) padulong sa Negros Occidental, Bacolod City kag Iloilo City sa sulod sang 14 ka adlaw sumugod Agosto 8.
