Liwat nga naghugpong ang mga miyembro sang Bacolod Alliance of Commuters Operators and Drivers Inc. (BACOD) sa pagpatigayon sang ikaduha nga adlaw nga transport strike.
Ini kasunod sang consolidation deadline kahapon, nga nagatapos naman sa provisional authority sang mga unconsolidated traditional jeepneys.
Sa interview sang Bombo Radyo Bacolod kay BACOD President Rudy Catedral, sila ang nagpatigayon man sang pagtililipon ang tanan nga miyembro sang grupo sa bilog nga Negros Occidental alas-3:00 sang hapon sa atubang sang Rizal Elementary School kag sila ang magaparada padulong sa old City Hall.
Panindugan sini nga ila ginakondenar ang pag-untat sa extension sang provisional authority samtang sila ang nagahingyo man sang extension sa pagreview sang public utility vehicle (PUV) modernization program.
Ang pagkastranded sang madamo nga mga pasahero kagab-i ang pamatuod na suno diri sang palpak nga programa.
Suno kay Catedral, luyag nila nga makita nga indi lamang mga magamay nga drivers kag operators ang maapektuhan sa pagkadula nila sa dalanon, kundi subong man ang mga pasahero.
Dugang pa sini nga indi lamang kabudlayan sa pagpangita sang masakyan ang alantuson sang mga pasahero kasubong man ang mahal nga pletehan.
Panindugan ni Catedral nga sila ang indi gid magpaconsolidate bangod indi nila luyag nga ang ila palangabuhian ang ginakaptan sang isa lamang ka kooperatiba ukon korporasyon.
Dugang pa sini nga madula man ang ila kinamatarong sa pagpanag-iya sang salakyan.
Pahayag pa sini nga tuman ka mahal ang units sang modernized jeepneys, kag indi man masarangan ang P7,000 kada adlaw nga balayran agud matapos sa utang sa sulod sang pito ka tuig
