Masobra 12,000 ka personnel sang kapulisan ang magasecure sang eleksyon sa bilog nga Western Visayas sa Lunes.
Suno kay Police Lt. Col. Arnel Solis, spokesperson sang Police Regional Office 6, nakapatigayon na sang simultaneous send-off ceremony sa mga police officers nga magabantay sa piniliay.
Suno kay Solis, handa na ang PRO 6 sa eleksyon kun sa diin igadeploy ang mga pulis sa nagkalain-lain nga bahin sang Region 6.
Nagreport naman ang augmentation force sa area kun sa diin sila ginpadala.
Wala naman sang nagpadala sang augmentation force sa Negros Occidental bangud bastante ang pwersa sa probinsya.
Ang iban naman nga banwa kag ciudad nga may sobra nga police officers ang ginbuhinan kag gin-augment sa iban nga bahin sang Western Visayas kaangay sang probinsya sang Iloilo nga ginpadal-an sang nagikan sa Bacolod City Police Office.
Ang mga pulis ang magabantay sa polling centers, election monitoring action centers, may mobile security teams kag may gindeploy man sa city kag municipal electoral board.
Kun kinahanglan gid suno kay Solis, may yara man sang quick response teams kag reserve force nga magaresponde.
Ang pagpull out sang pulis sa lugar sa diin sila gindeploy ang magadepende sa paghimos sang election paraphernalia kun tapos na ang eleksyon.
Nagpahanumdom naman si Solis sa mga police officers nga ipabilin ang commitment sa trabaho kag himuon ini nga may professionalism.
