Masobra 12,000 ka indibidwal ang ginbakwit sa southwest nga bahin sang France samtang padayon nga nagalapta ang wildfire sa rehiyon sang Gironde.
Yara sa 8,800 pa ka residente kag turista ang ginahanda para sa pagbakwit bilang pagpangaman.
Suno sa mga otoridad, masobra 3,100 hectares sang kagubatan sa palibot sang Arcachon Bay ang gintupok na sang kalayo.
Kadam-an sa mga ginbakwit ang mga turista naggikan sa mga campsite sa Lege-Cap-Ferret peninsula.
Ginsara man ang pila ka mga kalsada kag mga lugar nga malapit sa kagubatan.
Nagpaandam ang mga bumbero nga mas lauman ang paglala sang sitwasyon sa tuman man ka init nga panahon kag dugang pa sang pagmadlos sang hangin, nga nagapabudlay sa pag-palong sang kalayo.
Wala naman sang na-record nga ginbawian sang kabuhi ukon napilasan sa pinakaulihi nga wildfire.
Samtang, padayon man nga naeksperyensyahan ang wildfire sa Spain kag Italy.
Sa Sicily, isa ka bumbero ang napatay samtang nagaresponde sa sunog, sa Spain naman, halos 890 hectares na ang nasunog sa nabagatnan sang Madrid.
