Ginkompirmar sang pinuno sang Philippine Drug Enforcement Agency (PDEA) Negros Occidental nga ang druga nga naconfiscate sa syudad sang San Carlos kahapon ang nagikan sa Luzon, santo man sa ila imbestigasyon kaupod ang kapulisan sa San Carlos City Police Station.
Sa interview sang Bombo Radyo Bacolod kay Nicholas Gomez, nakita sa ila imbestigasyon nga ang suspected shabu nga nagikan sa Luzon ang shabu nga nakuha sa mga suspetsado nga si Emmanuel Siaboc alyas Eman, 31 anyos, residente sang Burgos Street, Brgy. 6, San Carlos City kag isa ka high value target.
Suno kay Gomez, nagikan sa luwas sa pungsod ang supply apang wala sila sang impormasyon kun sa diin nga pungsod.
Ang mga bulto sang iligal nga druga ang natigayon nga makasulod bangud ginaputos ini sa interior sang goma antes putson sa tea bag kag foreign language naman ang nasulat diri.
Ini man ang rason nga indi makita sa XRay machine sa airport kag ports kasubong man nga indi masimhutan sang K9 units.
Suno pa diri, ang mga confiscated nga shabu ang kabahin man sang mga naintercept sa Cebu kag Negros Oriental.
Indi pa man sini matumod kun may yara sang dako nga drug group sa likod sang nadakpan sa San Carlos City kahapon bangud may yara sila sang mga follow up investigations nga ginapatigayon.
Indi pa man sini mapahayag kun yara man ang duha sa watchlist sang PDEA.
Padayon nga magapatigayon sang follow investigation ang ahensya bangud madamo man sila sang ginamonitor nga mga lugar sa probinsya sang Negros Occidental kalakip na ang Bacolod bangud ginakonsiderar nga market man ang syudad sang iligal nga druga.
