P8.5 million nga balor sang suspected shabu ang narecover sang mga miyembro sang City Drug Enforcement Unit sang Bacolod City Police Office sa buybust operation nga ginpatigayon sa Purok Bolinao, Barangay 1, Bacolod City pasado alas-4:00 kaina sang kaagahon.
Ang subject sang buybust amo si Alvin Cristales, 27-anyos kag residente sang Purok Lison, Barangay 1 apang kaupod man sini sa balay si Regina Escosio, 44-anyos kag residente man sang Purok Lison, Barangay 1.
Ginpatigayon ang buybust operation sa ground floor sang balay nga ginaarkilahan ni Cristales.
Narekober sa possession ni Cristales ang 1,250 grams nga shabu nga may market value nga P8.5 million.
Sa interview sang Bombo Radyo kay CDEU head Police Lt. Joven Mogato, nakabaton sila sang impormasyon nga may nag-abot nga druga sa lugar gani ginvalidate ini kag naidentify ang target nga si Cristales tubtub nagmadinalag-on ang buybust operation.
Si Cristales ang nadakpan sa buybust operation sang tuig 2017 apang nakagwa sang tuig 2020 bangud sa plea bargaining agreement.// Si Escosio naman ang nadakpan sang tuig 2020 kag nakagwa sang tuig 2021.
Santo sa impormasyon nga nadawat nanday Mogato, sa La Carlota pa ginkuha ang druga kag gindul-ong diri sa Bacolod.
Suno kay Mogato, mahimo nga preparasyon na ini para sa MassKara Festival.
Si Cristales suno sa CDEU head ang nagadistribute sang shabu samtang si Escosio naman ang nagatago sang supply.
Santo sa impormasyon, duha tubtub apat ka kilo sang shabu ang nag-abot kanday Cristales sang Martes sang kaagahon apang masobra isa ka kilo nalang ang ila narecover.
Sa interview sang Bombo Radyo kay Escosio, kilalahay sila ni Cristales apang nagapuyo ini sa Purok Lison.
Suno diri, nagbakal ini sang shabu kag indi man sila magkaupod ni Cristales sa illegal nga negosyo.
Si Escosio ang may duha ka mga kabataan.
Ginpanginbulahan naman ni BCPO director Police Col. Thomas Joseph Martir ang CDEU sa madinalag-on nga operasyon.
Suno diri, nagbunga gid ang pagtinguha nanday Mogato kag dako nga volume ang narecover.
Nagpanawagan naman si Martir sa mga nagaduso sang illegal drugs nga untatan na ang illegal drug activity bangud maabot gid ang tion nga sila ang madakpan.
