Nagadangat sa milyon ang mga manok nga nagkalamatay sa pagwaswas sang bagyo Odette sa Negros Occidental.
Suno kay Negros Occidental Provincial Veterinarian Dr. Renante Decena, ang pinakadako nga nahalitan amo ang broiler industry ukon ang 45 days nga manok, nga sa karun sarang na maharvest sa 28 dias.
Ang kahalitan ang nagdangat sa P275,086,000 nga ginalakipan sang mga napatay nga manok, naguba nga mga housing facilities kasubong man ang mga nabasa nga mga feeds.
Kalakip man sa narusdak ang poultry farm sa Provincial Livestock Breeding Center and Dairy Farms sa La Granja, La Carlota City nga nagadangat ang balor sa P10 million.
Pahayag ni Decena nga dako ang nangin epekto sang bagyo sa dressing plant nga amo ang nagahemo sang mga dressed chicken matapos nga maghaplak ang building.
Paathag sini nga sa isa ka building, ang tunnel ventilation ang nagadangat sa balor nga P12 million kag ini ang tuman man ka importante bangod nagakalamatay ang mga manok kun magnubo ang temperatura.
Nagpalab-ot man sang simpatiya ang Provincial Veterinarian sa mga raisers bangod sa masobra milyon nga nagkalamatay nga piso kag mga manok ilabi na sa bahin sang Southern Negros Occidental.
Pahayag ni Decena nga yara lang ang dressing plant sang probinsya sa Southern Negros Occidental bangod ang broiler plant ang nahamtang sa Sagay City padulong sa Kabankalan City.
Suno diri, 278 ang kabug-usan nga farm sa probinsya kag tanan ang nakaangkon sang damage.
Apang pahayag sang Provincial Veterinarian nga ang pinakadako nga nahalitan amo ang tatlo ka mga local integrators kun sa diin narumpag ang mga establishimento sang mga ini kag nagkalapilpilan ang mga kasapatan.
