Kapin P1.4 million nga balor sang suspected shabu ang nakumpiskar sa 21-anyos nga lalaki nga subject sang buybust operation nga ginpatigayon sang City Drug Enforcement Unit (CDEU) sa Purok Kahirup, Barangay Singcang Airport, Bacolod City kagab-i.
Sa interview sang Bombo Radyo kay CDEU Head Police Lt. Joven Mogato, ang subject person ang ginkilala kay Jeboy Bulaclac, residente sang Purok Lampirong, Barangay 2, Bacolod City kag isa ka high value individual.
Suno kay Mogato, nakabaton sila sang impormasyon nga nagabaligya sang illegal nga druga ang suspetsado kag ang estilo sini amu ang pagmeet up sa mga ginabaligyaan sini.
Nakuha sa iya paghinakop ang 17 ka mga sachet sang suspected shabu nga nagabug-at sang 206 grams kag may estimated market value nga P1,400,800.
Sa karun nagapatigayon pa sang follow up operation ang mga kapulisan kun sin-o ang source sini.
Yara na sa karun si Bulaclac sa kustodiya sang Bacolod Police Station 8.
Samtang ginapanginwala naman ni Bulaclac nga siya ang nagaduso sang illegal nga druga kag nagpanindugan nga siya ang ginsugo lamang sang persona nga iya ginatawag “to” kag “meg.”
Suno sa iya, nakaputos kag nakaseal ang mga suspected shabu gani wala ini nakahibalo nga illegal ang ginapadala sa iya.
Suno pa diri, ginahatagan lamang ini sang instructions kag contact number kun diin sini idul-ong ang suspected shabu kag natalana kuntani sini nga dal-on ang nakuha sa iya subong nga gab-i sa down town area.
