Masobra sa P1 million nga balor sang illegal nga druga kag duha ka armas-luthang ang nakuha sa isa ka High Value Individual kag duha ka menor de edad sa Sitio Dacutan Dacu, Brgy. Mambulac, ciudad sang Silay, Negros Occidental, alas 9:54 sang aga kahapon.
Ang mga suspetsado amo ang subject nga si Elmer Abela Jr, alyas JR, 42-anyos, mananagat kag residente sang nasambit nga lugar, kag ang kaupod sini ang duha ka menor de edad.
Sa interview sang Bombo Radyo kay PLT COL Mark Anthony Darroca, hepe sang Silay City Police Station, naaresto ang mga suspetsado sa payag-payag sa tunga sang lawod nga ila ginataguan sang illegal nga druga.
Suno diri, nakumpiskar ang kapin sa 170 ka gramos sang suspected shabu nga ginabanta nagabalor sang P1,156,000.
Nakumpiskar man gikan sa tatlo ang isa ka handmade shotgun, isa ka caliber .38 revolver, isa ka botilya nga naga-unod sang ANFO (Ammonium Nitrate Fuel Oil), isa ka improvised tooter, kag iban pa nga non-drug items.
Si Abela ang makaagi na aresto angot man sa kaso sa illegal nga druga sang tuig 2003 kag nadismiss sang tuig 2011.
Sa karun si Abela ang yara na sa kustodiya sang Silay City Police Station nga magapangatubang sa kaso nga paglapas sa Republic Act 9165 ukon Comprehensive Dangerous Drugs Act of 2002, samtang ang duha naman ka menor de edad ang gin-turnover sa Silay City Youth Center.
