Nagdangat sa kapin sa P1,260,000 ang balor sang nakawat nga kwarta kag jewelry sa natabo nga pagpangransack sa isa ka mall sa ciudad ang San Carlos, kahapon, kapin alas- 12:50 sang kaagahon.
Sa interview sang Bombo Radyo Bacolod kay Police Lt. Col. Nazer Canja, hepe sang San Carlos City Police Station, duha ka lalaki ang nakita sa CCTV footage nga nagsulod sa mall nga naka-bonnet, may tabon ang nawong kag nagasuksok sang long sleeve.
Nag-agi sa drainage ang duha pasulod sa Grace Pharmacy sa sulod sang Gaisano Capital San Carlos.
Suno kay Chavez, kapin sa P1 million ang nakawat nga balor sang jewelry, P200,000 ang nakawat nga kwarta gikan sa vault sang botika kag P60,000 ang nakawat nga balor gikan sa Galleon Enterprises.
Sa karun may yara na sang isa ka person of interest ang mga kapulisan apang gina-imbestigahan pa kun inside-job ang natabo ukon indi.
May yara man sang mga guard nga naga-duty apang wala sang may nakabati sa nagakatabo sa sulod.
Madumduman nga sang Marso, ginransack man ang nasambit nga mall kag ang suspek sadto ang isa ka trabahante didto nga napasakaan na sang kaso apang wala nadakpan.
