BACOLOD CITY – Masobra isa ka milyon ka pesos nga balor sang shabu ang narekober sa buybust operation sang City Drug Enforcement Unit (CDEU) sa Mabini St. Brgy. 40 ciudad sang Bacolod las-4:30 kaina sang hapon.
Tatlo ka mga persona ang arestado sa nasambit nga operasyon lakip na ang mga subject sang operasyon nga mga katapo sang Muslim community.
Ginkilala ang mga subject nga sanday Amir Rashed Tantua kag Nelrose Salita pareho nga naga-edad sang 24-anyos kag kasado kun sa diin naaresto ang mga ini sa 2K Cell Shop nga nagabaligya sang mga DVD’s nga ila man mismo gina panag-iyahan.
Gindakop man ang empleyado sang shop nga si Aisah Million,19-anyos.
Lunsay pumuluyo sang Brgy. 30, ciudad sang Bacolod ang nagkaladakpan.
Suno kay Police Inspector Adrian James Albaytar, tagpamuno sang CDEU sang Bacolod City Police Office (BCPO), 21 ka bulto sang gina patihan shabu ang narekober sa mga suspetsado kag ginabulubanta nga naga balor ini sang 1 million and 50 thousand pesos.
Ginakabig nga street level pusher ang mga arestado kag nadakpan ang mga ini bangud sang pag follow-up sang CDEU sang nagligad nila nga mga operasyon.
Priso na sa karun ang mga suspetsado sa Bacolod City Police Station 6.
