Nagdangat sa masobra P1 million nga balor sang ginapahayag nga smuggled cigarettes ang nakuha sa sulod sang isa ka balay sa Purok Masanagon, Barangay Balintawak, cuidad sang Escalante, Nobyembre 11.
Sa interview sang Bombo Radyo Bacolod kay Police Captain Reynaldo Bauden, hepe sang Bacolod City Maritime Police, antes nagpatigayon sang operasyon nagcoordinate sila sa Bureau of Internal Revenue kun sa diin ang nasambit nga ahensya ang nagpanguna sa pagpatigayon sang anti-smuggling operations kag nag-assists lamang ang mga kapulisan.
Suno kay Bauden, natigayon ang nasambit nga operasyon apang wala na sang mga ini naabtan ang suspek gani wala madakpan kag ginakonsiderar nga abandonado na ang mga nakuha nga mga pakete kag ream sang smuggled cigarettes.
Nagdangat sa P1.1 million ang kabug-usan nga balor sang smuggled nga sigarilyo.
Ginalantaw man sang mga ini nga wala nadakpan ang ginatudlo tag-iya sang balay nga nakuhaan sang mga smuggled nga sigarilyo bangud wala ang mga ini nagpauli bangud mahimo namutikan na sang mga ini ang intel operatives sa lugar.
Ginpahayag ni Bauden nga ang mga suspek sa likod sang smuggling sang sigarilyo sa probinsya ang halin sa South kag nakilala na nila ang mga suspek nga gina-alegar mga Maranao.
Ang smuggled nga sigarilyo ang ginkustodiya sang BIR samtang ang mga suspek ang mangatubang sang kaso nga indi pagbayad sang buwis sa gobyerno sa tion nga sila ang madakpan.
