Masobra P1 million nga balor sang suspected shabu ang nakumpiskar sang mga pulis sa buybust operation nga ginpatigayon sa Purok Santan, Brgy. Camugao, Kabankalan City kahapon sang hapon.
Suno sa Kabankalan City Police Station, ang subject sang operasyon ang ginkilala kanday Jomy Consular, 42 anyos kag residente sang Sitio Linag-asan, Brgy. Hilamonan, Kabankalan City; kag Leosella Consular, 27 anyos kag residente man sang Sitio Linag-asan, Brgy. Hilamonan, Kabankalan City.
Nakuha sa paghinakop sang mga ini ang 24 tanan ka sachet sang suspected shabu nga nagabug-at sang 170 grams kag ginabanta nagabalor sang P1,156,000.
Ang mga suspetsado ang yara sa karon sa kustodiya sang Kabankalan City Police Station.
Ang nasambit nga operasyon ang ginpatigayon sang gintingob nga pwersa sang Station Drug Enforcement Team sang Kabankalan City Police Station, Provincial Drug Enforcement Unit, Negros Oriental Police Provincial Office in coordination sa Philippine Drug Enforcement Agency 6.
