Masobra P1 million ang balor sang suspected shabu nga narecover sa drug buybust operation nga ginpatigayon sang Bacolod City Drug Enforcement Unit (CDEU) sa Barangay Vista Alegre, Bacolod City.
Nakahunong sa karun sa Bacolod Police Station 7 ang tatlo ka mga suspetsado nga ginalakipan sang maghalf-brother kag ang ila nga bayaw.
Ang mga suspetsado ang ginkilala nga si Christian Gayoso, nga amo ang subject sa buybust, ang half brother sini nga si Lance Gawigan kag ang bayaw nila nga si Jason Baison.
Sa interview sang Bombo Radyo Bacolod kay Police Capt. Joven Mogato, head sa CDEU, una nga nadakop ang utod ni Gayoso sang Setyembre 1 nakaligad nga tuig kun sa diin ini ang nakuhaan sang masobra 200 gramos sang suspected shabu sa balor nga P2 million kag karun nakahunong na sa Bureau of Jail Management and Penology (BJMP) – Handumanan.
Suno diri madugay naman nila nga ginamonitor ang mag-utod nga ginalantaw nagsalo sa iligal nga aktibidad.
Ang mga suspetsado nga nadakpan ang anay nagapuyo sa Purok Sigay, Barangay 2 apang narelocate sa Barangay Vista Alegre.
Suno kay Mogato, himata man nila ang ila nga ginakuhaan sang iligal nga droga kag amo ang ginarolling sa mga katupad nga mga barangay.
Nakuha sa tatlo ka suspetsado ang isa ka knot tied transparent plastic sachet sang suspected shabu, lima ka big heat-sealed transparent plastic sachet sang suspected shabu nga ginabanta nagabug-at sang 157 grams kag may standard drug price nga P1,067,600.
