Masobra P100,000 nga balor sang illegal nga druga ang nakumpiskar sa buybust operations nga ginpatigayon sang Bacolod Police Station 2 kag PNP DEG SOU6 sa Sitio Sibucao, Barangay Banago, Bacolod City, Sabado sang hapon.
Sa interview sang Bombo Radyo kay Police Captain Paul Vincent Pendon, station commander sang Bacolod Police Station 2, ginkilala ang subject person kay Raymart Dalisay alias Boy, 25 anyos, single kag kaupod sini nga nadakpan nga nagabaligya man sang illegal nga druga amu si Dona Jane Buenaflor alias Mai-mai, 24 anyos, may bana kag bata, lunsay mga street level individual kag residente sang nasambit nga lugar.
Suno kay Pendon, una na nga napriso si Dalisay sa Bacolod Police Station 3 bangud sa kaso nga Theft.
Nakuha sa ila paghinakop ang tatlo ka bulto sang suspected shabu nga nagabug-at sang 15 ka gramos kag may estimated market value nga P102,000 kag iban pa gid nga mga drug paraphernalia.
Sa karun nakahunong ang mga suspetsado sa Bacolod Police Station 2 kag natalana nga pasakaan sang kaso nga paglapas sa R.A. 9165 ukon Comprehensive Dangerous Drugs Act of 2002.
