Masobra sa P11 million nga balor sang smuggled nga sigarilyo ang narecover sa duha ka lalaki sa Barangay Talaban, Himamaylan City, Negros Occidental, Sabado, Oktubre 4.
Ang mga suspek ang ginkilala nga sanday alias “Midcpal”, 42-anyos, truck driver, residente sang Brgy. Tituan, Zamboanga City; kag alias “Julvin”, 39-anyos, truck helper, kag residente sang Brgy. Butan, Jolo, Sulu.
Sa impormasyon nga nakuha sang Bombo News Team ang duha ang nadakpan matapos ang ginpatigayon nga joint anti-smuggling operation sang Regional Maritime Unit-Negros Island Region kaupod ang Himamaylan City Police Station.
Sa tion sang operasyon, namutikan sang mga otoridad ang pila ka mga makaduluda nga indibidwal nga may dala sang pila ka boxes sang suspected smuggled cigarettes.
Gilayon man nga ginpadulungan ini sang team kag nagpatigayon sang inspection.
Sang gin-verify napaslawan ang mga ini nga magpresentar sang nagakaigo nga dokumento.
Bangud sini gin-aresto ang duha kag nakuha ang 170 boxes ukon 8,500 reams sang PURE Cigarettes; 15 boxes ukon 750 reams sang FORT Cigarettes; 5 boxes ukon 250 reams sang BERLIN Cigarettes; kag gin-impound man ang puti nga FUSO Panel Truck.
Ang duha ang nakahunong na sa Himamaylan City Police Station bangud sa paglapas sa Section 1401 sang Republic Act 10863 (Unlawful Importation) in relation to Section 6 of Republic Act 10643 (Graphic Health Warnings on Tobacco Products Act of 2014).
