Ginabanta P13,668,000 nga balor sang iligal nga droga ang nakumpiskar sa gina-alegar nga mag-utod nga babayi sa Barangay Lantad, Silay City, Negros Occidental kaina sang aga.
Ang mga suspetsado ang ginkilala kanday Angie Dumdumaya, 30 anyos kag Angielyn Dumdumaya, 25 anyos lunsay mga residente sa nasambit nga lugar.
Ang joint drug buybust operation ang ginpatigayon sang Regional Police Drug Enforcement Unit 6 kag Silay City Police Station.
Narecover gikan sa duha ang lima ka dalagko nga sachet sanb suspected shabu nga nagabug-at sang kapin duha ka kilo kag nagabalor P13,668,000.
Ang mga suspetsado ang yara na sa paghinakop sang Silay City Police Station.
Sa interview sang Bombo Radyo Bacolod kay Police Brigadier General Leo Francisco, regional director sang Police Regional Office 6, madugay na ginamonitor sang mga kapulisan ang mga subject persons kag ang mga ini ang ginakabig nga high value individual (HVI).
Suno diri, ginatumod pa sang mga otoridad kung mag-utod ang duha.
Sa karun, ginpaidalom na sa imbestigasyon ang mga nadakpan nga subject persons agud matumod kun ano ang partisipasyon sang mga ini sa transaksyon sang illegal nga druga kag kun sa diin ginakuha ang supply sang illegal nga druga.
Suno sa regional director sang PRO-6, ang pagdakop sang duha ka high value individual kag pagrekober sang masobra duha ka kilo nga suspected shabu ang kabahin sang padayon nga kampanya sang mga kapulisan batok sa ilegal nga druga kag nagapakita lamang nga madamo pa sang ilegal nga druga ang ila dapat trabahuon.
