Masobra P14 million nga balor sang suspected shabu ang nakumpiskar sang mga pulis sa anay priso nga subject sang drug buybust operation sa Purok Pablo Torre, Barangay Vista Alegre, Bacolod City kaina sang kaagahon.
Sa interview sang Bombo Radyo Bacolod kay Police Captain Joven Mogato, pinuno sang City Drug Enforcement Unit sang Bacolod City Police Office, ginkilala ang nadakpan kay Michael Frias, 43 anyos, kag residente sang nasambit nga lugar.
Nakumpiskar diri ang duha ka kilo kag 115 gramos nga suspected shabu nga nagabalor sang P14,382,000.00.
Ginakabig na nga high value individual si Frias kag nakahunong na sa Bacolod City Police Station 7.
Suno kay Mogato, si Frias ang nakagwa sa prisuhan sadtong 2019 matapos nga nadakpan sang 2009 sang Philippine Drug Enforcement Agency (PDEA) sa paglapas sa RA 9165 ukon Comprehensive Dangerous Drugs Act of 2002.
Napriso ini sang lima ka tuig sa Bacolod antes ginsaylo sa New Bilibid Prison sa Muntinlupa City kag nagserbe man sang lima ka tuig.
Sang 2019, nakagwa ini bangud nadismiss ang kaso sa Court of Appeals.
Madugay naman ini nga ginmonitor sang CDEU si Frias antes pa man ini ginpatigayunan sang drug buybust operation.
Suno kay Mogato, ginaverify pa sang mga ini kun matuod nga miyembro sang Caunda Drug Group si Frias.
Ginatumod pa man ang ginakuhaan sang supply sang illegal nga druga ni Frias.// Una na nga ginpahayag ni BCPO city director Police Col. Noel Aliño nga ang Caunda Drug Group ang nadismantle na.
