BACOLOD CITY-Masobra P18 million nga balor sang ginasuspetsuhan shabu ang nakumpiskar sang kapulisan sa buybust operation sa Purok Gonzaga, Brgy.Taculing, Bacolod City kaina sang kaagahon.
Alas-3:30 kaina sang kaagahon sang ginpatigayon sang Police Station 3 ang operasyon batok sa subject nga si Kenneth Jacosalem alyas Bonbon, legal ang edad kag residente man sang nasambit nga barangay.
Nakuha sa paghinakop ni Jacosalem ang 15 ka transparent knot tied plastic wrappers nga may unod nga white crystalline substance nga ginasuspetsuhan shabu lakip na ang buybust item, P1,000 nga buybust money, isa ka backpack kag isa ka digital weighing scale.
Ginabanta nga nagabug-at sang 1,205 grams ang suspected shabu kag may Dangerous Drugs Board (DDB) value nga P18,075,000.00.
Una pa nga nagpalagyo ang suspetsado apang nadakpan ini sa hot pursuit operation alas-5:45 kaina sang kaagahon kag priso na karun sa Police Station 3.
