Masobra P2 million nga balor sang illegal nga druga ang nakumpiskar sang Bacolod City Police Office City Drug Enforcement Unit sa duha ka mga high value individual sa buybust operation nga ginpatigayon sa Purok San Roque 1, Barangay Handumanan, Bacolod City alas 2:51 kaina sang kaagahon.
Sa impormasyon nga nakuha sang Bombo Radyo, arestado sanday Maria Elirica Celis, 39-anyos kag Carlo Purillo, 36-anyos, lunsay mga residente sang nasambit nga lugar.
Nakuha sa ila paghinakop ang P3,000 nga buybust money; isa ka ziplock plastic bag nga naga-unod sang suspected shabu; 13 ka heat sealed transparent plastic sachet sang suspected shabu dala na ang buybust item; isa ka sling bag; isa ka coin purse; kag P241 nga cash proceeds.
Ang nakumpiskar nga illegal nga druga ang ginabanta nagabug-at sang 300 grams kag may estimated market value nag P2,040,000.
Sa karun nakahunong na sanday Celis kag Purillo sa Bacolod Police Station 10 kag magapangatubang sang kaso nga paglapas sa R.A. 9165 ukon Comprehensive Dangerous Drugs Act of 2002.
