Masobra P2 million ang kabug-usan nga balor sang suspected shabu nga nakumpiskar sang mga Bacolod Police Station sa magkasunod nga buybust operation sa Barangay Alijis kag Barangay Singcang Airport kaina sang kaagahon.
Suno kay Police Major Joery Puerto, station commander sang Bacolod Police Station 8, masobra P1.3 million nga balor sang illegal nga druga ang nakumpiskar sa una nga drug buybust operation nga ginpatigayon sa Purok Villa Baradas, Barangay Alijis.
Ang subject sang buybust amo si Ramon Vertudes, 31-anyos kag residente sang nasambit nga lugar.
Si Vertudes ang nabaklan sang balor P1,000 nga suspected shabu kag sang naconsummate na ang buybust, nakuhaan pa gid ini sang dugang nga shabu nga nagabug-at sang 205 grams kag may estimated market value nga P1,394,000.
Sang naaresto na si Vertudes, nagtuad ini nga may yara ini sang kabayo ukon runner sa Barangay Singcang Airport gani ginkasa naman ang isa pa gid ka buybust operation sa Purok Kahirup, Barangay Singcang-Airport.
Ang subject diri ang ginkilala kay John Mark Milana, 21 anyos, kag residente sang Prk. Torre, Brgy. Mansilingan.
Nakuha sa possession ni Milana ang 110 grams nga suspected shabu nga ginabanta nagabalor sang P748,000.
