Masobra sa P200,000 nga balor sang suspected marijuana ang narecover sa ginpatigayon nga buybust operation sa Celine Homes, Barangay Estefania, ciudad sang Bacolod, kahapon sang kaagahon, Pebrero 9.
Ginkilala ang nadakpan kay alyas Dave, 21 anyos kag residente sang nasambit nga lugar.
Sa interview sang Bombo Radyo Bacolod kay Police Maj. Elmer Bonilla, station commander sang Bacolod Police Station 4, public knowledge na sa lugar nga ang nasambit nga persona ang nagabaligya sang illegal nga druga.
Suno kay Bonilla, natigayon ang buybust operation matapos mabaklan ang subject person sang suspected marijuana.
Nakakuha ang mga ini sang impormasyon nga ang subject person ang namonitor nga nagadeliver sang nasambit nga illegal nga druga sa lugar.
Una man ini nga bes nga siya ang nagapungko nga pinuno sang Bacolod Police Station 4 nga nakarecover sang amo kadako nga balor sang marijuana.
Suno sa station commander ang tanan nga mahibaluan sang mga ini nga nagabaligya sang illegal nga druga ang ginapatigayunan nila sang buybust operation.
Narekober kay alyas Dave ang 1.5 kilos sang gina-alegar nga dried marijuana nga may street prevailing price nga P225,000.
Nakahunong na si Alyas Dave sa Bacolod City Police Station 4 kag magapangatubang sang nagakaigo nga kaso ang suspect.
