P3.4 million nga balor sang suspected shabu ang nakumpiskar sa duha ka mga persona sa buybust operation sang Victorias City Police Station kag PNP Drug Enforcement Group sa Hacienda Cristina, Brgy 21, Victorias City, Negros Occidental, Huwebes sang hapon.
Sa interview sang Bombo Radyo kay Police Lt. Col. Joseph Fajardo, hepe sang Victorias City Police Station, arestado sanday Jesther Soquena, 46 anyos, ginakabig nga Top 1 City Level Drug Personality kag residente sa Doña Juliana Subd. Brgy Taculing, Bacolod City kag Biboy Dacumos, residente sang Lison, Barangay 1, Bacolod City.
Suno kay Fajardo ang mga suspetsado amu ang nagadeliver sang illegal nga druga sa Bacolod City.
Nakuha sa ila paghinakop ang isa ka dako nga heat sealed transparent plastic sachet sang suspected shabu; tatlo ka big knot tied transparent plastic sachet sang suspected shabu; 17 ka dalagko nga heat sealed transparent plastic sachet sang suspected shabu; P1,000 bill nga buybust money; P12,000 nga boodle money; isa ka green nga paper bag; kag isa ka black nga plastic garbage bag.
Ang nakumpiskar nga illegal nga druga ang ginabanta nagabug-at sang 500 grams kay may estimated market value nga P3.4 million.
Sa karun nakahunong ang mga suspetsado sa Victorias City Police Station kag natalana nga pasakaan sang kaso.
