Nadakpan sang mga otoridad ang isa ka babayi nga pasahero matapos makumpiskar ang masobra P39.1 milyon nga balor sang cocaine nga ginapatihan gintago sa bagahe sini sa Ninoy Aquino International Airport (NAIA).
Suno sa pahayag sang Philippine National Police (PNP), ginpatigayon ang anti-narcotics operation sang NAIA Inter-Agency Drug Interdiction Task Group (NAIA-IADITG) halin Enero 29 tubtob 30, matapos sila makabaton sang intelligence information nahanungod sa pag-abot sang isa ka 38 anyos nga babayi nga pasahero nga gina-alegar nagadala sang ilegal nga droga.
Nadiskubrehan nga ang pasahero ang halin pa sa Sao Paulo, Brazil kag nag-agi sa Doha, Qatar antes nag-abot sa NAIA Terminal 3.
Sa ginpatigayon nga routine X-ray screening, may natukiban nga butang ang isa ka inspector sang Bureau of Customs (BOC) sa sulod sang isa ka green trolley bag.
Gilayon naman ini nga ginpaidalom sa secondary inspection ang bagahe upod ang bulig sang Philippine Drug Enforcement Agency (PDEA) K9 unit, nga naghatag sang indikasyon sang presensya sang ilegal nga droga.
Sa manual inspection, nadiskubrehan ang isa ka gintago nga compartment nga may sulod nga apat ka pouch nga ginputos sang tape, plastik, carbon paper kag foil.
Nakumpirmar nga ang narekober nga substance amo ang cocaine, nga may ginabanta nagabalor sang P 39,181,660.
Gilayon nga gin-aresto ang babayi kag sa karun yara na sa NAIA-IADITG para sa nagakaigo nga disposisyon.
