Narecover ang balor P4.216 millon nga suspected shabu sa drug buybust operation nga ginpatigayon sa Brgy Villamonte, Bacolod City.
Ang operasyon ang ginpangunahan sang PDEA – Negros Island Region kaupod ang mga kapulisan sang Agosto 15, 2026 sang kaagahon.
Kun sa diin naaresto ang isa ka 41-anyos nga lalaki nga ginkilala nga si “Jimmy,” isa ka driver kag residente sang Brgy Bata, Bacolod City.
Nakumpiskar sa operasyon ang ginabanta nga 620 grams sang suspected shabu, nga may standard drug price nga P4.216 millon.
Narekober man ang buy-bust money, isa ka pink belt bag, smartphone, P15,000 nga cash, kag isa ka motorsiklo.
Ang naaresto pasakaan sang kaso sa paglapas sa Sections 5 kag 11, Article II sang Republic Act No. 9165 ukon Comprehensive Dangerous Drugs Act of 2002.
Nakakumpiskar man ang Police Regional Office Negros Island Region (PRO NIR) sang ginabanta nga 335.87 grams nga suspected shabu, nga may standard drug price nga P2,283,916, sa ginpatigayon nga buy-bust operation sa Purok Lubi, Barangay 1, San Carlos City, Negros Occidental sang Agosto 14, 2026.
Ang arestado ang ginkilala nga si alyas Ry, 27 anyos, isa ka store owner kag residente sang nasambit nga lugar.
Suno sa impormasyon sang pulis, ginadudahan siya nga nagabaligya sang illegal nga droga kag gina-alegar nga ang sari-sari store ang ginagamit bilang front sa iya illegal nga aktibidad.
Sa operasyon, narekober ang 18 ka heat-sealed sachet nga ginadudahan nga shabu, isa ka pink nga bag, kag P900 nga buy-bust money.
Ang suspek yara na sa kustodiya sang San Carlos City Police Station para sa nagakaigo nga disposisyon kag pagpasaka sang kaso.
