Nagdangat sa masobra P4 million ang narecover nga smuggled nga sigarilyo sa ginpatigayon nga inspection gikan sa mga tindahan ukon tyangge sa lima ka mga Barangay sa San Carlos City, Negros Occidental.
Sa interview sang Bombo Radyo Bacolod kay Police Lt. Col. Jesus Mesahon, hepe sang San Carlos City Police Station, masobra duha ka kaha sang sigarilyo ang ila nga nakumpiskar sa operasyon nga ginpangunahan sang Bureau of Internal Revenue (BIR).
Suno kay Mesahon, anom ka mga Barangay ang nalakip sa listahan sang ila target nga patigayunan sang inspection, kun sa diin lima ka Barangay ang may narecover nga mga iligal nga produkto.
Dugang pa sini nga wala sang sticker gikan sa BIR ang nakumpiskar nga mga sigarilyo, nga nagapamatuod nga ang mga ini ang smuggled ukon wala nagabayad sang buwis.
Paathag ni Mesahon nga wala sang may gindakop sa nasambitan nga opeeasyon kag confiscation lamang ang ila nga ginbuhat.
Suno pa diri, makaluluoy ang mga tag-iya sang tyangge nga madakpan kag makuhaan sang produkto, ilabi na ang mga wala sang ihibalo sa paglantaw kun authentic ukon indi ang mabakal sang mga ini nga sigarilyo.
Sa karun, wala pa matumod kun sa diin nagikan ang nasambitan nga sigarilyo.
Bangod sini, plano sang BIR sa masunod nga semana nga magpatigayon sang information drive agud wala na sang may magabakal sang smuggled nga mga sigarilyo.
