Nagdangat sa masobra P4 million ang balor sang suspected shabu nga nakumpiskar sa duha ka lalaki sa drug buybust operation nga ginpatigayon sa Purok Tangigue, Barangay 1, Bacolod City alas-10:20 kagab-i.
Ang mga suspetsado nga ginakabig High Value Individual (HVI) ang nga ginkilala nga sanday Jhonie Cabrillos, 27 anyos, single, wala sang trabaho kag Eric Aguirre, 22 anyos, single, wala sang trabaho kag lunsay mga residente sa lugar.
Sa interview sang Bombo Radyo Bacolod kay P/Capt. Joven Mogato, head sa Bacolod City Drug Enforcement Unit (CDEU), ginpahayag sini nga duha ka semana man nila nga ginmonitor si Cabrillos antes napatigayon ang buybust sa iya mismo nga puluy-an.
Magluwas kay Cabrillos, kaupod man sini nga nadakpan si Aguirre nga nagaserbe sini nga kabayo ukon runner sa pagbaligya sang iligal nga droga.
Nakuha sa paghinakop sang duha ang walo tanan ka sachet sang suspected shabu kalakip na ang buybust item kag pito ka knot-tied plastic bag sang suspected shabu nga nagadangat sa kabug-aton nga 600 gramos.
Ang iligal nga droga ang nagabalor sang P4,080,000.
Narecover man sa operasyon ang P3,000 nga buybust money, isa ka coin purse kag isa ka sling bag.
Gin-athag ni Mogato nga si Aguirre ang nadakop naman sadto bangod sa paghupot sang iligal nga droga apang si Cabrillos ang karun palang nadakpan.
Si Cabrillos ang isa ka anay construction worker apang nag-untat sa trabaho agud magbaligya sang iligal nga droga.
Ginalantaw naman nga gikan sa gwa sang Bacolod City ang source sang subject kag ini ang ila pa nga gina-imbestigahan.
Suno kay Mogato, mahimo nga liwat na nga nagapatigayon sang illegal drug transaction ang mga durugista subong nga Pebrero bangod nangin hugot ang pagbantay sang mga kapulisan sa syudad tinalikdan nga bulan tuga sang mga ginpatigayon nga kapiestahan.
Ang duha ang nakahunong na sa karun sa kustodiya sang Bacolod Police Station 2 kag natalana magpangatubang sang kaso may kaangtanan sa paglapas sa Republic Act 9165 ukon Comprehensive Dangerous Drugs Act of 2002.
