Masobra P400,000 nga balor sang illegal nga druga ang nakumpiskar sa drug buybust operation nga ginpatigayon sang Bacolod Police Station 5 kag City Drug Enforcement Unit sa sulod sang Rose Lawn Cemetery, Barangay Bata, Bacolod City alas 7:25 kagab-i.
Sa interview sang Bombo Radyo kay Police Executive Master Sergeant Adan Labrador, ang subject person ang ginkilala kay Ereneo Pranisa alias May-May, 34-anyos, isa ka street level individual kag residente sang Purok Mahigugmaon, Barangay Tangub, Bacolod City.
Una naman ini nga napriso bangud sa kaso nga robbery.
Suno kay Labrador, mismo si Pranisa ang nagpropose sa poseur buyer nga sa sulod sang patyo sila mapatigayon sang transaksyon.
Nakuha sa iya paghinakop ang tatlo ka sachet sang suspected shabu, isa ka tied transparent plastic sachet sang suspected shabu, P500 bill nga marked money kag mga drug paraphernalia.
Ang nakumpiskar nga illegal nga druga ang nagabug-at sang 60 gramos kag may estimated market value nga P408,000.
Sa karun nakahunong na si Pranisa sa Bacolod Police Station 5 kag natalana nga pasakaan sang kaso nga paglapas sa R.A. 9165 ukon Comprehensive Dangerous Drugs Act of 2002.
