Malapit tunga sa million nga balor sang illegal nga druga ang nakumpiskar sa duha ka mga persona sa buybust operation nga ginpatigayon sang City Drug Enforcement Unit sa Purok Neptune, Barangay Singcang Airport, Bacolod City kagab-i.
Sa interview sang Bombo Radyo kay CDEU Team Leader Police Lt. Joven Mogato, ginkilala ang mga suspetsado sanday Edwin Alvarez, 55 anyos kag Ronel Dayanan, 37 anyos, lunsay mga residente sang nasambit nga lugar.
Suno kay Mogato, si Alvarez ang isa ka high value individual samtang street level individual naman si Dayanan.
Si Alvarez ang una na nga napasakaan sang kaso may kaangtanan sa illegal nga druga sang 2018 kag Disyembre 2021 ini nakagwa sa prisuhan.
Nakuha sa ila paghinakop ang 67 ka gramos sang suspected shabu nga may estimated market value nga P455,600.
Sa karun nakahunong ang mga suspetsado kag magapangatubang sang kaso nga paglapas sa R.A. 9165 ukon Comprehensive Dangerous Drugs Act of 2002.
