Narecover ang balor P5.4 million nga suspected shabu sa drug buybust operation nga ginpatigayon sa isa ka pamilya sa Barangay 2, Victorias City kun sa diin may tatlo nga naaresto kag isa nga nakapalagyo.
Ang mga naaresto ang ginkilala nga sanday Ponciano Tanag, 47 anyos, bata sini nga si Christian Tanag, 24 anyos kag abyan ni Ponciano nga si Artemio Aringgo, 37 anyos.
Samtang nakapalagyo naman ang asawa ni Ponciano.
Sa interview sang Bombo Radyo Bacolod kay Police Major Joy Ellaga, deputy chief of police sang Victorias City Police Station, si Ponciano ang madugay na nga nakarecord nga high value individual samtang lunsay street level individual naman ang iya bata kag abyan.
Si Ponciano ang tatlo ka beses na nga napriso bangod sa paghupot kag pagbaligya sang illegal nga droga.
Narecover sa paghinakop sang mga ini ang ginabanta 800 grams sang suspected shabu nga may standard drug price nga P5,440,000.
Ginalantaw ni Ellaga nga ang supply ang preparasyon na para sa Kalamayan Festival nga maga-umpisa bwas Disyembre 13 tubtob na sa katapusan sang Disyembre.
Ginpahayag naman sang mga suspect nga ang supply ang ginakuha nila sa Bacolod City kag sila ang nagabaligya sa nanari nga local government units sa Northern Negros Occidental, indi lamang sa Victorias City.
Napasaka na nila sa City Prosecutor ang kaso may kaangtanan sa paglapas sa Republic Act 9165 ukon Comprehensive Dangerous Drugs Act of 2002 batok sa apat ka suspect, lakip na ang nakapalagyo.
Pasalig ni Ellaga nga wala naga-untat ang Victorias City Police Station sa pagmonitor kag paglagas sang mga nagabaligya sang illegal nga droga.
Pamatuod sini ang mga dalagko nga recoveries subong nga Christmas season.
