Masobra sa P5 million nga balor sang illegal nga druga ang nakumpiskar sa 26 anyos nga lalaki, sa Barangay Pahanocoy, Bacolod City, ala 1:56 kaina sang kaagahon.
Ang suspetsado ang ginkilala nga si Rene Lapera Jr, alyas “Ombap”, 26 anyos, wala sang trabaho kag residente sang Villa Lourdes, Barangay Pahanocoy, Bacolod City.
Sa interview sang Bombo Radyo kay Police Captain Melvin Mercado, hepe sang Bacolod Police Station 8, ginakabig nga High Value Individual si Lapera bangod nga masobra sa 50 ka gramo ang nakumpiskar diri.
Suno diri, masami nga nagagwa ang alyas ni Lapera nga “Ombap” sa mga previous drug apprehension sang kapulisan.
Ginpatigayonan sang buy bust operaiton si Lapera sang Police Station 8 kun sa diin ini naaresto.
Nakuha sa paghinakop ni Lapera ang 11 ka big heat sealed transparent plastic sachet sang suspected shabu kalakip na ang buy bust item, napulo ka knot tied transparent plastic sachet sang suspected shabu, isa ka digital weighing scale kag tatlo ka one thousand peso bill nga buy bust money.
Ang nakumpiskar nga druga may yara sang kabug-aton nga kapin 800 ka gramo nga ginabanta nagabalor sang P5,440,000.
Padayon pa ang imbestigasyon sa background sang suspetsado kag suno kay Mercado luyag sini nga mahibaluAn kun diin ang source nga ginakuhaan sini sang illegal nga druga.
Samtang, suno sa suspetsado siya ginatawagan lamang para magtransaksyon apang wala na ini nagpagwa pa sang iban nga detalye.
Sa karun yara na ini sa kustodiya sang Police Station 8 nga magapangatubang sa kaso nga paglapas sa section 5 kag 11 sang RA 9165 ukon Comprehensive Dangerous Drugs Act of 2002.
