Masobra sa P500,000 nga balor sang illegal nga druga ang nakumpiskar sang Bacolod City Police Office (BCPO) kag City Drug Enforcement Unit (CDEU) sa drug buybust operation nga ginpatigayon sa Circumferential Road, Barangay Villamonte, Bacolod City, kagab-i.
Ang mga suspetsado ang ginkilala nga sanday Isagani Tarlac, 42 anyos, single kag Althea Joy Ballentes, 24 anyos, single, lunsay wala sang trabaho kag mga residente sang Purok Bayanihan, Barangay Villamonte.
Ginpangunahan sang CDEU kaupod ang BCPO ang pagconduct sang buy-bust operation nga nagresulta sa pagka-aresto sang duha ka mga suspetsado.
Narekober gikan sa paghinakop sang duha ang 12 tanan ka medium heat sealed transparent plastic sachet sang suspected shabu nga ginabanta nagabug-at sang 85 grams kag nagabalor sang kapin sa P578,000.
Ang duha ang magapangatubang sang kaso sa pagbayolar sang Section 5 kag 11 sang RA 9165 ukon Comprehensive Dangerous Drugs Act of 2002.
