Masobra P54,000 nga balor sang illegal nga druga ang nakumpiskar sa buybust operations nga ginpatigayon sang Bacolod Police Station 7 kagab-i sa Blk 52, Lot 5, Calantas, Abada Escay, Brgy. Vista Alegre, Bacolod City.
Sa interview sang Bombo Radyo kay Police Lt. Conrado Espino Jr., hepe sang Bacolod Police Station 7, pasado alas 7:00 kagab-i sang ila natigayon nga madakpan si Bernel Dewara, 44 anyos kag residente sang nasambit nga lugar.
Suno sa iya, ginakabig nga new identified subject si Dewara kag wala ini sang previous nga kaso apang ang suspetsado nga ila nadakpan sa ila nauna nga buybust operations ang nagakuha sa iya sang illegal nga druga.
Nakuha sa iya paghinakop ang 5 ka sachet sang suspected shabu; P500 nga marked money; kag isa ka pouch.
Ang nakumpiskar nga illegal nga druga ang nagabug-at sang walo ka gramos kag nagabalor P54,400.
Sa karun nakahunong ang suspetsado sa Bacolod Police Station 7 kag nakatalana nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
