Gin-aprubahan na ang P6,457,539,794.00 nga 2025 Annual Budget sang Provincial Government sang Negros Occidental sa ginpatigayon nga regular session sang Sangguniang Panlalawigan kahapon sang hapon.
Bangud wala si Vice Governor Jeffrey Ferrer bangud sa official business gani ang nagpreside sa session amo si Board Member Jongben Mirhan.
Unanimously approved sang mga katapo sang Provincial Board ang resolution para sa approval sang proposed annual budget nga ginduso ni First District Board Member Rommel Debulgado nga chairman sang Committee on Finance.
Sa nasambit nga budget, P6.2 billion ang para sa General Fund kag P254.4 million ang para sa Economic Enterprise Development Department (EEDD) nga isa ka special account sa idalom sang General Fund.
P2.094 billion ukon 33.77 percent ang napain para sa personnel services sa mga opisina kalakip na sa ospital.
P1.6 billion naman ukon 26.83 percent ang para sa maintenance ang other operating expenses (MOOE), samtang P2.4 billion naman ukon 39.24 percent sang budget ang napain para sa Special Purpose Appropriations.
Una nga ginpasaka ni Board Member Delgado sa second reading ang ginaduso nga budget sang probinsya para sa 2025 kun sa diin naaprubahan unanimously kasubong man sa 3rd and final reading.
Ang nasambit nga budget ang wala man ginbuhinan, kun sa diin gin-aprubahan ang kantidad nga ginduso para sa budget.
Ini man ang mataas sang 18.8 percent ukon P1.22 billion kun ipaanggid saa 2024 provincial budget.
Nagsaka man ang National Tax Allotment sang Negros Occidental sa 2024 kun sa diin gindugang sa budget para sa 2025 kag magluwas diri may yara man sang income ang probinsya.
