Arestado ang 29 anyos nga lalaki matapos nga makuhaan sang kapin sa P6,800,000 nga balor sang suspected shabu sa Purok Bomba, Barangay Salvacion, Murcia, Negros Occidental, kagab-i, alas- 6:05 sang gab-i.
Ang suspetsado ang ginkilala nga si Carl John Arroyo, single, wala sang trabaho, kag residente Purok 42 Bayanihan, Barangay Villamonte, Bacolod City.
Sa report sang Murcia Municipal Police Station, sila ang nakabaton sang tawag angot sa nagluntad nga vehicular accident sa Barangay Salvacion, Murcia.
Paglab-ot sa area, ginsecure sang kapulisan ang mga drayber nga involved sa insidente apang nakita sang mga police nga naga-panic ang isa ka drayber nga amo si Arroyo.
Ini ang nakakuha sang atensyon sang mga kapulisan kag amo nga nakita nga may kapin sa isa ka kilo sang shabu sa bag sang suspetsado.
Sa karun, yara na sa kustodiya sang Murcia Municipal Police Station si Arroyo nga magapangatubang sang nagakaigo nga kaso.
