Masobra P700,000 ang balor sang iligal nga droga nga nakumpiskar sa duha ka mga suspetsado nga nadakop sa ginpatigayon nga drug buybust operation sa Barangay 12, Bacolod City.
Ang subject sa buybust operation ang ginkilala kanday Gomer Beloya alyas Gomer, 46 anyos kag residente sa Father Fererro St, Purok Masinadyahon, Barangay 12, Bacolod City kun sa diin ginpatigayon ang buybust operation kag si Melvin Generoso alyas Jake, 41 anyos residente sa Kadalag-an Village Victorias City, Negros Occidental.
Si Beloa ang ginakabig nga high value individual (HVI).
Nakuha sa paghinakop sang mga suspetsado ang 22 ka sachet sang suspected shabu kalakip na ang buybust item.
Ang suspected shabu ang nagabug-at sang 110 gramos kag may ginabanta balor nga P748,000.
Narecover man gikan sa mga ini ang P1,000 bill nga buybust money kag 12 ka panid sang P1,000 bill nga boodle money.
Nakuha man gikan sa mga suspetsado ang isa ka coinpurse nga ginabutangan sang mga ini sang iligal nga droga.
Ang mga nagkaladakpan ang nakahunong na sa kustodiya sang Bacolod Police Station 6 samtang ang mga non-drug evidence ang yara sa kustodiya sang Philippine Drug Enforcement Group – Special Operations Unit 6 para sa dokumentasyon kag proper disposition.
Ang mga suspected shabu ang ginturn-over na sa Negros Occidental Provincial Crime Laboratory Office para sa forensic kag laboratory examination.
