Kabug-usan nga 102 ka mga locally stranded individuals (LSIs) ang nag-abot kahapon sa probinsya sang Negros Occidental.
Sa interview sang Bombo Radyo Bacolod kay Dr. Zeaphard Gerhart Gerhart Caelian, pinuno sang Provincial Incident Management Team (PIMT), ginpahayag sini nga 92 kabilog nga mga LSI ang nag-abot kahapon sang hapon nagikan sa Manila samtang 10 naman ang nag-abot kahapon sang aga halin sa Batangas.
Suno kay Caelian, halos natapos na ang ginpatuman nga moratorium sa mga LSI sa mga local government units (LGUs) sa probinsya.
Apang padayon naman nga wala pa nagabaton sang mga returning residents ang ciudad sang San Carlos nga magatakop ang moratorium sa Enero 29 kag ang banwa sang Hinigaran nga magatapos naman sa Enero 7.
Subong nga adlaw naman natalana nga magatapos ang moratorium sa banwa sang Murcia.
Nagaayo naman si Caelian nga kuntani timprano pa makaabot ang mga ini sa mga pantalan kag airport kag indi man tuman ka gab-i ukon kaagahon agud makapahuway man ang swab team, medtechs kag responders.
Nagapanugyan man ini sa mga magapauli nga magpakig-angot gid sa ila kada LGU.
Liwat naman nga ginpatpat ni Caelian ang mga requirements para sa mga LSI agud makasulod sa probinsya.
Ini ang nalakipan sang travel authority kag medical certificate.
Samtang ang swab test naman ang pagahimuon pag-abot sang mga ini sa probinsya antes dal-on sa quarantine facility.
