Nagdangat sa 322 ang mga wanted persons nga naaresto sa bilog nga Western Visayas sa sulod lamang sang 15 ka adlaw.
Sa interview sang Bombo Radyo Bacolod kay Police Lt. Col. Arnel Solis, spokesperson sa Police Regional Office 6, sa 322 nga naserbihan sang warrant of arrest halin Mayo 1 tubtob 15, ang 56 diri ang ginakabig nga most wanted persons samtang 266 naman ang other wanted persons.
Pinakamadamo nga naaresto nga most wanted persons ang mga kapulisan sa Iloilo province nga nagdangat sa 16, samtang 14 naman ang sa Negros Occidental, walo sa Capiz, pito sa Antique, apat sa Iloilo City, tig-isa sa Bacolod City, Aklan, Guimaras, kag Criminal Investigation and Detection Group (CIDG) Regional Field Unit 6.
Sa pihak nga bahin, nagpanguna naman ang Negros Occidental sa kadamuon sang naaresto nga other wanted persons nga ginbug-usan sang 132.
Ginasundan sang 52 sa Iloilo, tig-21 sa Bacolod City kag Antique, 16 sa Iloilo City, 11 sa Capiz, walo sa Aklan, tig-duha sa Regional Mobile Force Battalion 6 kag CIDG Regional Field Unit 6, kag isa sa Guimaras.
Ginapasalig ni Solis nga gingamit sang kapulisan ang husto nga proseso sa pag-aresto kay may-ara man sang mga body worn cameras ang mga police personnel nga makapamatuod.
Ginapakamaayo man sini nga wala sang nagpakatig-a kag nagbato sang ginserbe ang warrant of arrest.
