Masobra P20.5 million ang balor sang suspected shabu nga narecover sa drug buybust operation nga ginpatigayon sa Purok Neptune, Barangay Singcang Airport, Bacolod City kaina alas-3:14 sang hapon.
Sa interview sang Bombo Radyo Bacolod kay Police Captain Joven Mogato, pinuno sa Bacolod City Drug Enforcement Unit, ang suspetsado ang ginkilala nga si Jummel Camento alyas Tata, 38 anyos, single, wala sang trabaho kag residente sa nasambitan nga lugar.
Ginalantaw man nga ang dako nga supply sang illegal nga droga ang gintalana para sa highlight sang Masskara Festival 2023.
Pahayag ni Mogato nga pito tubtob napulo ka adlaw lamang ang ila nga monitoring sa suspetsado bangod ini ang may record naman matapos madakpan sa paglapas sa Republic Act 9165 ukon Comprehensive Dangerous Drugs Act of 2002 sang 2012 kag nakagwa sa prisuhan tinalikdan lamang nga tuig.
Ang buybust operation ang ginpatigayon mismo sa balay sang suspetsado kun sa diin kaupod sini nga nagapuyo ang iya ginikanan kag mga utod.
Narecover sa paghinakop sini ang 15 ka sachet sang suspected shabu nga nagabug-at 3.20 kilograms kag may standard drug price nga P20,536,000.
Santo sa intelligence monitoring, si Camento ang ginadagdagan sang binulto nga shabu ni Michael Frias, nga nadakpan sang Agosto 10 nga nagahupot sang masobra duha ka kilo nga shabu sa Barangay Vista Alegre sa balor nga P14,382,000.
Ginalantaw ni Mogato nga bangod nadakpan si Frias, kay Camento ginpasalo ang supply bangod ini ang iya nga downline.
Ginapatihan nga nagikan sa gwa sang Negros Island ang supply kag ini ang mahimo gintalana subong nga Masskara Festival 2023.
Sa karun gina-imbestigaran pa kun si Camento ang kabahin man sa aktibo nga Caunda Drug Group bangod una na nga natumod nga miyembro diri si Frias.
