Nagdangat sa masobra tres mil nga mga broiler chickens ang natupok sang kalayo matapos gin-alegar nga ginsunog sang kapin apat ka armado nga persona ang Poultry Farm sa Purok Mabuhay, Barangay Sagasa, Bago City.
Ang insidente ang natabo kahapon kapin alas-3:00 sang kaagahon kun sa diin suno kay Leonid Dalisay, manager sang Poultry Farm, antes paman ang insidente may ginpadala nga sulat sa ila trucker nga nagapangayo sang kwarta.
Ang letter ang naka-address nga gikan kanday Ka Dodong kag Ka Badong.
Apang ini ang wala na ginsapak ni Dalisay sa pagpinsar nga ini ang scam lamang, kag kasubong man sang paglantaw sang mismo tag-iya.
Apang kahapon sang kaagahon, hinali na lamang nagsulod ang gina-alegar apat ka persona, gingapos ang ila bantay nga yara sa payag-payag sa atubang sang Poultry House.
Ini ang gindala padulong sa balay ni Dalisay, nga gilayon man sini nga ginbuksan bangod ang iya nga tinawo ang ginsugo nga magpanawag.
Apang nagsugata sa iya ang nakataya nga armas kag pagpapili sa iya sang mga suspetsado sa paghatag sang tinago sini ukon ang iya pamilya ang kuhaon.
Bangod sini ginkuha ni Dalisay ang belt bag sa iya kwarto nga naga-unod sang P15,000 cash.
Sila ang sunod nga ginpasulod sa payag, kag sa pagbiya nagpamahog pa ang mga suspect nga buhuan ang ila ulo kun sila ang magasunod.// Ulihi nga nabatian sang mga ini ang mando sang isa sa mga suspect nga sunugon ang Poultry House.
Paghalin sang mga suspect, gilayon nga gindalagan ni Dalisay agud masecure ang iya nga pamilya.
Sa pihak nga bahin, totally burned na ang poultry house sang makaabog ang firetruck sang Bago City Fire Station.
Sa interview sang Bombo Radyo Bacolod kay Senior Fire Officer 1 Giovanni Saude, Fire Safety and Enforcement Section Head sang Bago City Fire Station, ginabanta P850,000 ang balor sang kahalitan sang sunog.
Sa karun padayun pa ang ila nga imbestigasyon sa gintunaan sang kalayo, kag pasalig ni Saudi nga ginakonsiderar nila ang statement sang mga biktima.
Apang paathag sini nga sang mag-abot ang mga fire personnel sila ang wala sang may naabtan nga nakagapos kaangay sa alegasyon.// Ang Poultry House ang sarang masudlan sang singko mil nga mga broiler chickens, apang sila ang una na nga nakadispose kag kapin tres mil na lamang ang nabilin sang matabo ang pagpanunog.
