Nagdangat sa masobra P500.5 million ang initial nga report natuhoy sa kahalitan sang Bagyo Odette sa mga nagkalainlain nga livestock ukon kasapatan sa Negros Occidental.
Suno kay Negros Occidental Provincial Veterinarian Dr. Renante Decena, ini ang labing una nga kahigayunan para sa probinsya ang amo kadako nga kahalitan ilabi na sa livestock industry.
Suno kay Decena, hangin ang nag-igo sa Northern Negros Occidental nga nagpatugaplak sa mga buildings, broilers, layers kag piggery.
Samtang madamo naman ang nalumos nga livestocks bangod sa pagbaha sa Southern Negros Occidental.
Nagpanguna sa pinakamalala nga nahalitan ang broilers nga nagdangat sa masobra P275 million.
Ikaduha naman diri amo ang mga piggeries nga nagdangat ang kahalitan sa masobra P100.36 million.
Malala man ang nangin kahalitan sa game fowl industry nga nagdangat sa P51 million, ang laying industry ang nakareport naman sang inisyal nga P54.75 million nga kahalitan kag mga baka, karabao kag iban pa nga kasapatan nga nagdangat sa P64.13 million.
Suno kay Decena, ini ang initial assessments palang bangod madamo pa sang wala nabatun nga reports, ilabi na sa bahin sang backyard raisers.
Kaupod man sa emergency meeting subong nga hapon ang mga presidente sang nagkalainlain nga organisasyon, agud nga mapungkuan kun ano ang mahimo sang probinsya sa nasambit nga mga sektor.
Dugang pa sang Provincial Veterinarian nga diskusyunan man nila kun paano mapahapos kag mapadali ang recovery.
Nagapangabay naman si Decena nga pinaagi sa naagyan sa pagwaswas sang bagyo Odette, mangin lesson na ini agud nga mangin mas resilient pa ang Negros Occidental sa tion sang pag-igo sang mga kalamidad.
